ന്യൂഡല്ഹി: ട്രെയിന് സര്വിസുകളുടെ കൃത്യനിഷ്ഠ മെച്ചപ്പെടുത്താനും വൈകുന്നത് കണ്ടെത്താനും ഇന്ത്യന് റെയില്വേ പുതിയ മൊബൈല് ആപ്ലിക്കേഷന് അവതരിപ്പിച്ചു. ട്രെയിനുകളുടെ ഓട്ടം തല്സമയം നിരീക്ഷിച്ച് ആവശ്യമായ ഇടപെടലുകള് നടത്താന് റെയില്വേ ഉദ്യോഗസ്ഥരെ സഹായിക്കുന്ന തരത്തിലാണ് ആപ്പ് രൂപകല്പ്പന ചെയ്തിരിക്കുന്നത്. സൗത്ത് കോസ്റ്റ് റെയില്വേയുടെ വിജയവാഡ ഡിവിഷന് വികസിപ്പിച്ച 'പങ്ച്വാലിറ്റി ബിസെഡ്എ' എന്ന ആന്ഡ്രോയിഡ് ആപ്പിലൂടെ ട്രെയിനുകളുടെ നിലവിലെ സ്ഥിതി, സമയക്രമം തുടങ്ങി പ്രധാന വിവരങ്ങള് മൊബൈലില് തന്നെ ലഭ്യമാകും. ഡെസ്ക്ടോപ്പ് അധിഷ്ഠിത സംവിധാനങ്ങളെ അപേക്ഷിച്ച് വേഗത്തിലും കാര്യക്ഷമമായും വിവരങ്ങള് ലഭ്യമാക്കുന്നതാണ് ആപ്പിന്റെ പ്രത്യേകത.