തിരുവനന്തപുരം: തിരുവനന്തപുരത്ത് സ്കൂള് കെട്ടിടത്തിൻ്റെ മേല്ക്കൂര തകര്ന്നുവീണു. അട്ടക്കുളങ്ങര ഗവ. സെന്ട്രല് ഹൈസ്കൂള് വളപ്പിലെ സമഗ്ര ശിക്ഷാ കേരളയുടെ ഓഫീസ് മുറിയാണ് തകര്ന്നത്. കുട്ടികളും അധ്യാപകരും ഇറങ്ങിയശേഷം വൈകീട്ട് ആറുമണിയോടെയാണ് അപകടം. അതിനാല് ആളപായമുണ്ടായില്ല. സംഭവത്തില് വിദ്യാഭ്യാസ മന്ത്രി റിപ്പോര്ട്ട് തേടി. എസ്എസ്എയുടെ ഓഫീസ് പ്രവര്ത്തിച്ചിരുന്ന കെട്ടിടമാണ് ഇതെന്ന് അധികൃതര് പറയുന്നു. കെട്ടിടത്തിന്റെ ഒരു ഭാഗം പൂര്ണമായും ഇളകി മേല്ക്കൂര തകര്ന്ന് വീണ നിലയിലാണ്. നഗരസഭാ അധികൃതരും ഫയര്ഫോഴ്സും ഉള്പ്പെടെ സ്ഥലത്തെത്തിയിട്ടുണ്ട്.
തിരുവനന്തപുരം: സംസ്ഥാനത്ത് മഴ ശക്തമാകുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. ഇന്ന് ഒന്പത് ജില്ലകളില് യെല്ലോ അലര്ട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മലപ്പുറം, കോഴിക്കോട്, വയനാട്, കണ്ണൂര് ജില്ലകളിലാണ് നിലവില് മഴ മുന്നറിയിപ്പ് നല്കിയിരിക്കുന്നത്. അടുത്ത അഞ്ചു ദിവസങ്ങളില് സംസ്ഥാനത്ത് വ്യാപകമായ മഴയ്ക്ക് സാധ്യതയുണ്ടെന്നാണ് കാലാവസ്ഥ വകുപ്പിന്റെ മുന്നറിയിപ്പ്. ഇതിന്റെ അടിസ്ഥാനത്തില് വിവിധ ജില്ലകളില് ഓറഞ്ച്, യെല്ലോ അലേര്ട്ടുകള് പ്രഖ്യാപിച്ചിട്ടുണ്ട്. ജൂണ് മൂന്നിന് ആലപ്പുഴ, കോട്ടയം, എറണാകുളം, തൃശൂര് ജില്ലകളില് ഓറഞ്ച് അലര്ട്ട് പ്രഖ്യാപിച്ചു. ജൂണ് നാലിനു തിരുവനന്തപുരം മുതല് തൃശൂര് വരെയുള്ള എട്ടു ജില്ലകളിലും ശക്തമായ മഴ സാധ്യത കണക്കിലെടുത്ത് ഓറഞ്ച് അലര്ട്ട് തുടരുന്നതാണ്. ജൂണ് അഞ്ചിന് ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും മുന്നറിയിപ്പ് നല്കിയിട്ടുണ്ട്.