കണ്ണൂര്: കണ്ണൂര് എഡിഎം കെ നവീന് ബാബുവിന്റെ ആത്മഹത്യയുമായി ബന്ധപ്പെട്ട് ജില്ലാ കലക്ടര്ക്കെതിരെയും പരാതി വന്ന സാഹചര്യത്തില് കണ്ണൂര് കലക്ടര് സ്ഥാനത്തുനിന്ന് അരുണ് കെ വിജയനെ മാറ്റാന് സാധ്യത. റവന്യൂ വകുപ്പിന് മുഖ്യമന്ത്രി പിണറായി വിജയന്റെ അനുമതി ലഭിച്ചാലുടന് അരുണ് കെ വിജയനെ മാറ്റും.നവീന്റെ കുടുംബവും പത്തനംതിട്ട സിപിഐഎമ്മും എഡിഎമ്മിന്റെ ഓഫിസിലെ ചില ഉദ്യോഗസ്ഥരും യാത്രയയപ്പ് ദിവസത്തെ വിവാദ പ്രസംഗത്തില് കലക്ടറുടെ പെരുമാറ്റത്തില് അതൃപ്തി പ്രകടിപ്പിച്ച പശ്ചാത്തലത്തിലാണ് നീക്കം നടക്കുന്നത്.
എഡിഎം കെ നവീന് ബാബുവിന്റെ ആത്മഹത്യയും ഫയല് നീക്കവും സംബന്ധിച്ച വിശദാന്വേഷണ ചുമതലയില് നിന്ന് കലക്ടര് അരുണ് കെ വിജയനെ മാറ്റിയിട്ടുണ്ട്. കലക്ടര് അരുണ് കെ വിജയന്റെ മൊഴി പോലിസ് ഉടന് രേഖപ്പെടുത്തും. മൊഴിയെടുക്കാന് പോലിസ് അനുമതി തേടിയിട്ടുണ്ട്. ഈ പശ്ചാത്തലത്തിലാണ് കലക്ടറെ വിശദാന്വേഷണ ചുമതലയില് നിന്ന് നീക്കിയിരിക്കുന്നത്. നവീന്റെ മരണത്തില് കലക്ടറുടെ റിപ്പോര്ട്ട് ഇന്ന് സര്ക്കാരിന് കൈമാറുമെന്നാണ് വിവരം. പ്രാഥമിക അന്വേഷണത്തില് നവീന്റെ ഭാഗത്ത് വീഴ്ച ഉണ്ടായിട്ടില്ല എന്നാണ് റിപ്പോര്ട്ട്. പെട്രോള് പമ്പിന് എന്ഒസി നല്കിയ സംഭവത്തില് അന്വേഷണം പുരോഗമിക്കവെ ജില്ലാ കലക്ടറുടെ റിപ്പോര്ട്ടും ഏറെ നിര്ണായകമാണ്.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ