തിരുവനന്തപുരം: വാര്ത്താ സമ്മേളനത്തിന് എത്താന് വൈകിയതിന്റെ പേരില് കെപിസിസി പ്രസിഡന്റ് കുപിതനായ സംഭവത്തില് പ്രതിപക്ഷ നേതാവ് വിഡി സതീശന് കടുത്ത അതൃപ്തിയില്, പ്രതിഷേധം വിഡി സതീശന് എഐസിസി നേതൃത്വത്തെ അറിയിച്ചു. കെസി വേണുഗോപാല് പ്രശ്ന പരിഹാരത്തിനായി ഇടപെട്ടു. ഇരു നേതാക്കളോടും അദ്ദേഹം സംസാരിച്ചു. ഇരു നേതാക്കളോടും സംയുക്ത വാര്ത്താ സമ്മേളനം വിളിക്കാന് എഐസിസി നേതൃത്വം നിര്ദ്ദേശിച്ചു. എന്നാല് വിഡി സതീശന് മാധ്യമങ്ങളെ കാണാന് തയ്യാറായില്ല. ഇതോടെ കെ സുധാകരന് ഒറ്റയ്ക്ക് മാധ്യമപ്രവര്ത്തകരെ കണ്ട് വിശദീകരണം നല്കുകയായിരുന്നു.
കെപിസിസിയുടെ സമരാഗ്നി യാത്രയുടെ ഭാഗമായ വാര്ത്താസമ്മേളനം ആലപ്പുഴയില് വിളിച്ചത് രാവിലെ പത്ത് മണിക്കായിരുന്നു. 10.28ന് കെ സുധാകരന് സ്ഥലത്തെത്തി. എന്നാല് പ്രതിപക്ഷ നേതാവ് എത്തിയില്ല. ഡിസിസി അധ്യക്ഷന് ബാബു പ്രസാദിനോട് വിളിച്ചു നോക്കാന് സുധാകരന് ആവശ്യപ്പെട്ടു. പിന്നെയും 20 മിനിറ്റ് കാത്തിരുന്നിട്ടും സതീശന് എത്തിയില്ല. ഇതോടെയാണ് സുധാകരന് കുപിതനായി ഇയാളിതെവിടെ പോയി കിടക്കുന്നുവെന്ന് പറഞ്ഞുകൊണ്ട് അസഭ്യം പറഞ്ഞത്.
ഒടുവില് 10.58 ന് വിഡി സതീശന് എത്തി. പിന്നീട് വാര്ത്താ സമ്മേളനം തുടങ്ങി ഇരുവരും മറ്റൊരു പരിപാടിയിലേക്ക് പോയി. കെപിസിസി അധ്യക്ഷന്റെ നീരസം വാര്ത്തയായതോടെ ആലപ്പുഴയിലെ മറ്റൊരു പരിപാടിയില് പങ്കെടുക്കാന് പോയതിനാലാണ് വി ഡി സതീശന് വൈകിയത് എന്ന വിശദീകരണവുമായി നേതാക്കള് എത്തി. വിവാദത്തില് നേതാക്കളുടെ വിശദീകരണം തേടിയെങ്കിലും മാധ്യമങ്ങള്ക്ക് മുന്നിലൂടെ ഒരേ കാറില് ഒരുമിച്ചു സഞ്ചരിച്ച് ഇരുവരും ഭിന്നതയില്ലെന്ന് പ്രകടമാക്കി. നേരത്തെ പുതുപ്പള്ളി ഉപതെരഞ്ഞെടുപ്പിനിടെ വാര്ത്താ സമ്മേളനത്തില് ആദ്യം ആര് സംസാരിക്കും എന്നതിനെ ചൊല്ലി ഉണ്ടായ വിവാദങ്ങള് കെട്ടടങ്ങും മുന്പാണ് ഇരുവരും തമ്മിലുള്ള ഭിന്നത വീണ്ടും പരസ്യമാകുന്നത്.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ