ആലപ്പുഴ: ലോക്സഭ തെരഞ്ഞെടുപ്പില് മുസ്ലീം ലീഗ് മൂന്നാം സീറ്റ് ചോദിക്കുന്നതില് തെറ്റില്ലെന്ന് എഐസിസി ജനറല് സെക്രട്ടറി കെസി വേണുഗോപാല് പറഞ്ഞു. സ്ഥാനാര്ഥികളെക്കുറിച്ചുള്ള ഊഹാപോഹങ്ങളോട് പ്രതികരിക്കാനില്ല. സിപിഐഎമ്മിനാണ് അങ്കലാപ്പ്. കഴിഞ്ഞതവണയും സിപിഐഎം സ്ഥാനാര്ഥികളെ നേരത്തെ പ്രഖ്യാപിച്ചു. ലീഗ് മൂന്നാം സീറ്റ് ചോദിക്കുന്നതില് തെറ്റില്ല. മുന്നണി രാഷ്ട്രീയത്തില് സ്വാഭാവികമായ കാര്യമാണിത്. പരസ്പരം വിട്ടുവീഴ്ച ചെയ്താലേ മുന്നണി മുന്നോട്ട് പോകുവെന്നും കെസി വേണുഗോപാല് പറഞ്ഞു. പ്രതിപക്ഷ ശബ്ദങ്ങളെ നിശബ്ദമാക്കാനാണ് ശ്രമം. രാഹുല് ഗാന്ധിക്കെതിരെ 23 കേസുകളായി. അജിത് പവാറിനും അശോക് ചവാനുമെതിരെ അഴിമതി ആരോപണങ്ങള് ഉണ്ടായിരുന്നു. ആദായ നികുതി വകുപ്പ് റെയ്ഡ് നടന്ന കമ്പനികള് റെയ്ഡിന് പിന്നാലേ ബിജെപിക്ക് പണം നല്കുകയാണ്. ബിജെപിയില് ചേര്ന്നപ്പോള് എല്ലാം ക്ലീന്. രാമക്ഷേത്രം ബിജെപിയുടെ അഴിമതിയും കഴിവുകേടും മറക്കാനുള്ള ആയുധമാണെന്നും കെസി വേണുഗോപാല് പറഞ്ഞു.
ഇതിനിടെ, ലീഗുമായുള്ള സീറ്റ് വിഭജന ചര്ച്ചകള്ക്കായുള്ള യുഡിഎഫിന്റെ നിര്ണായകയോഗം നാളെ കൊച്ചിയില് നടക്കും. മൂന്ന് സീറ്റ് വേണമെന്ന് ലീഗിന്റെ ആവശ്യമാണ് നാളെ പ്രധാനമായും പരിഗണിക്കുന്നത്. കോട്ടയത്ത് കേരള കോണ്ഗ്രസും കൊല്ലത്ത് ആര്എസ്പിയും സ്ഥാനാര്ത്ഥികളെ പ്രഖ്യാപിച്ചു കഴിഞ്ഞു. മൂന്ന് സീറ്റ് വേണമെന്ന ലീഗിന്റെ കടുംപിടുത്തത്തെ തുടര്ന്നാണ് കോണ്ഗ്രസിന്റെയും മുസ്ലിം ലീഗിന്റെയും സ്ഥാനാര്ത്ഥിനിര്ണയ ചര്ച്ചകളിലേക്ക് പാര്ട്ടികള്ക്ക് കടക്കാന് കഴിയാത്തത്. നിലവിലെ സാഹചര്യത്തില് മൂന്ന് സീറ്റ് നല്കാന് കഴിയില്ല എന്നാണ് കോണ്ഗ്രസിന്റെ നിലപാട്. ഒഴിവു വരുന്ന രാജ്യസഭാ സീറ്റ് നല്കണമെന്നത് ഉള്പ്പെടെയുള്ള ഉപാധികളാണ് ലീഗ് മുന്നോട്ട് വയ്ക്കുന്നത്. ലീഗിന്റെ പിടിവാശി കാരണം ചര്ച്ച നീണ്ടു പോയതില് കടുത്ത അതൃപ്തി കോണ്ഗ്രസ് നേതാക്കള്ക്കുണ്ട്. ഉഭയകക്ഷി ചര്ച്ചകള് ആദ്യം ആരംഭിച്ചിട്ടും എല്ഡിഎഫിലെ സ്ഥാനാര്ഥി ധാരണകള് പൂര്ത്തിയായ ശേഷമാണ് യുഡിഎഫ് അന്തിമ തീരുമാനത്തിനായി യോഗം ചേരുന്നത്. രാഹുല് ഗാന്ധി മത്സരിക്കുന്നില്ല എങ്കില് വയനാടോ, കെ സുധാകരന് ഇല്ലെങ്കില് കണ്ണൂര് സീറ്റൊ വേണമെന്നാണ് ലീഗിന്റെ ആവശ്യം.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ