റേഷന് വിതരണവുമായി ബന്ധപ്പെട്ട സാങ്കേതിക പ്രവര്ത്തനങ്ങള് നടത്തേണ്ടതിനാല് ഏപ്രില് 27, 28 തീയതികളില് റേഷന് കടകളുടെ പ്രവര്ത്തനം നിര്ത്തി വയ്ക്കാന് തീരുമാനിച്ചതായി ഭക്ഷ്യമന്ത്രി ജി. ആര്. അനില് അറിയിച്ചു. നിലവിലെ സെര്വറുകളില് സൂക്ഷിച്ചിരിക്കുന്ന ഡാറ്റാ, ക്ലൗഡ് സ്റ്റോറേജിലേക്ക് മാറ്റുന്നതിന് രണ്ടു ദിവസത്തെ സമയം ആവശ്യമാണെന്ന് നാഷണല് ഇന്ഫര്മാറ്റിക്സ് സെന്റര് (എന്.ഐ.ഡി) അറിയിച്ചതിന്റെ അടിസ്ഥാനത്തിലാണ് നടപടി. സാങ്കേതിക തകരാറുകള് കാരണം സംസ്ഥാനത്ത് റേഷന് വിതരണം തടസപ്പെട്ട സാഹചര്യം വിലയിരുത്തുന്നതിന് മന്ത്രിയുടെ അധ്യക്ഷതയില് ഉന്നത ഉദ്യോഗസ്ഥരുടെയും ബന്ധപ്പെട്ട ഏജന്സികളുടെയും യോഗം ചേര്ന്നു. പ്രശ്നപരിഹാരത്തിന് ഡാറ്റാ ക്ലൗഡ് സ്റ്റോറേജിലേക്ക് മാറ്റേണ്ടതുണ്ടെന്ന് റേഷന് വിതരണത്തിന് സാങ്കേതിക സഹായം നല്കുന്ന എന്. ഐ. സി യോഗത്തില് അറിയിച്ചു. സംസ്ഥാനത്തെ റേഷന് വിതരണം ഇടയ്ക്കിടെ മുടങ്ങുന്നതിലെ ആശങ്ക മന്ത്രി എന്. ഐ. സിയെ അറിയിച്ചു. ഏപ്രില് മാസത്തെ റേഷന് വിതരണം മെയ് 5 വരെയുണ്ടാകും. മെയ് ആറ് മുതല് മെയ് മാസത്തെ റേഷന് വിതരണം ആരംഭിക്കും.
മലപ്പുറം, തൃശൂര്, പാലക്കാട്, കൊല്ലം, ആലപ്പുഴ, പത്തനംതിട്ട, വയനാട് ജില്ലകളില് ഏപ്രില് 29, മെയ് 2, 3 തീയതികളില് രാവിലെ 8 മുതല് ഉച്ച ഒരു മണി വരെയും എറണാകുളം, കോഴിക്കോട്, തിരുവനന്തപുരം, കണ്ണൂര്, കോട്ടയം, കാസര്കോട്, ഇടുക്കി ജില്ലകളില് ഈ തീയതികളില് ഉച്ച രണ്ടു മുതല് രാത്രി ഏഴു വരെയും റേഷന് കടകള് പ്രവര്ത്തിക്കും. മെയ് നാല് മുതല് സാധാരണ സമയക്രമം ആയിരിക്കും.
റേഷന് വ്യാപാരി സംഘടനാ പ്രതിനിധികളുമായി മന്ത്രി ഓണ്ലൈന് യോഗത്തില് സംസാരിച്ചു. സാങ്കേതിക തകരാറുകള് പൂര്ണമായി പരിഹരിച്ച ശേഷം കടകള് പ്രവര്ത്തിക്കുന്നതാണ് ഉചിതമെന്ന് വ്യാപാരികള് അഭിപ്രായപ്പെട്ടു. സാങ്കേതിക തകരാറുകള്ക്ക് ഉത്തരവാദി റേഷന് വ്യാപാരികളല്ലെന്നും ഇക്കാരണത്താല് കടകളില് അതിക്രമിച്ചു കയറി വ്യാപാരികളെ ആക്രമിക്കുന്നതിനെ ന്യായീകരിക്കാന് കഴിയില്ലെന്നും മന്ത്രി പറഞ്ഞു. ഇത്തരം സാഹചര്യങ്ങളില് ഇവര്ക്ക് ആവശ്യമായ പോലീസ് സംരക്ഷണം നല്കാന് സര്ക്കാര് പ്രതിജ്ഞാബദ്ധമാണെന്ന് മന്ത്രി അറിയിച്ചു.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ