അധോലോക കുറ്റവാളി സിയയുടെ കൂട്ടാളി നപ്പട്ട റഫീഖിനെതിരെ ഇന്റര്‍പ്പോളിന്റെ റെഡ് കോര്‍ണര്‍ നോട്ടീസ്; രാജ്യത്തെ ഏത് പൊലീസിനും റഫീഖിനെ അറസ്റ്റു ചെയ്യാം

 

കാസര്‍കോട്: അധോലോക ഗുണ്ട സിയയുടെ കൂട്ടാളിയും കാസര്‍കോട് ഉപ്പള സ്വദേശിയുമായ നപ്പട്ട റഫീഖിനെതിരെ ഇന്റര്‍പ്പോള്‍ റെഡ് കോര്‍ണര്‍ നോട്ടീസ് പുറപ്പെടുവിച്ചു.

ഇയാള്‍ ഗള്‍ഫിലാണുള്ളതെന്ന് പൊലീസ് പറഞ്ഞു.ഉപ്പള അട്ടഗോളി കയ്യാര്‍ സ്വദേശിയാണ് മുഹമ്മദ് റഫീഖ് എന്ന നപ്പട്ട റഫീഖ് (32). കാസര്‍കോട് പൊലീസിന്റെ അപേക്ഷ പ്രകാരമാണ് റെഡ്കോര്‍ണര്‍ നോട്ടീസ് പുറപ്പെടുവിച്ചത്.

ഇതുപ്രകാരം ഏത് രാജ്യത്തെ പൊലീസിനും എവിടെ വച്ചും ഇയാളെ അറസ്റ്റ് ചെയ്യാം.കൊലപാതകം, തട്ടിക്കൊണ്ടുപോകല്‍, മോഷണം,പിടിച്ചുപറി അടക്കം കേരളത്തിലും കര്‍ണാടകത്തിലും നിരവധി കേസുകളില്‍ പ്രതിയാണ് ഈയിടെ മുംബൈ വിമാനത്താവളത്തില്‍ വെച്ച്‌ അറസ്റ്റിലായ സിയ.

ഗുരുതരമായ കുറ്റകൃത്യങ്ങള്‍ നടത്തി വിദേശത്തേക്ക് രക്ഷപ്പെട്ട വിവിധ കേസുകളില്‍ ഉള്‍പ്പെട്ട പ്രതികള്‍ക്കെതിരെയും റെഡ്കോര്‍ണര്‍ നോട്ടീസ് പുറപ്പെടുവിക്കാനുള്ള നടപടി പുരോഗമിച്ചു വരുന്നതായി കാസര്‍കോട് ഡിവൈഎസ്‌പി പി ബാലകൃഷ്ണന്‍ നായര്‍ പറഞ്ഞു.