ഉമ്മ ചക്ക മുറിക്കുന്നതിനിടയിൽ പലകക്കത്തിക്കു മുകളിലേയ്ക്ക് വീണ് എട്ടുവയസുകാരന് ദാരുണാന്ത്യം

കാസർകോട്: ഉമ്മ ചക്ക മുറിക്കുന്നതിനിടയിൽ പലകക്കത്തിക്കു മുകളിലേയ്ക്ക് വീണ് എട്ടുവയസുകാരന് ദാരുണാന്ത്യം. ബദിയഡുക്ക, പിലാങ്കട്ടയിലെ ഓട്ടോ ഡ്രൈവർ അമീർ കോളാരി – സുലൈഖ ദമ്പതികളുടെ ഇരട്ടമക്കളിൽ ഒരാളായ ഹുസൈൻ ഷഹബാസ് (8) ആണ് അതിദാരുണമായി മരണപ്പെട്ടത്. ബുധനാഴ്ച വൈകുന്നേരമാണ് നാടിനെ കണ്ണീരിലാഴ്ത്തിയ സംഭവം നടന്നത്. മാതാവിനൊപ്പം ആലംപാടി ,ബെള്ളൂറടുക്കയിലെ വീട്ടിൽ എത്തിയതായിരുന്നു ഹുസൈൻ ഷഹബാസ് . മാതാവ് അടുക്കള ഭാഗത്തിരുന്ന് പലകക്കത്തി ഉപയോഗിച്ച് പഴുത്ത ചക്ക മുറിക്കുകയായിരുന്നു. ഇവിടേക്ക് ഓടിയെത്തിയ കുട്ടി കത്തിക്കു മുകളിലേയ്ക്ക് വീഴുകയായിരുന്നു. നെഞ്ചിനു അരികിൽ ആഴത്തിൽ മുറിവേറ്റ കുട്ടിയെ ഉടൻ ആശുപത്രിയിലെത്തിച്ചുവെങ്കിലും രക്ഷിക്കാനായില്ല.മൃതദേഹം ജനറൽ ആശുപത്രി മോർച്ചറിയിലേയ്ക്ക് മാറ്റി.വിദ്യാ നഗർപൊലീസ്‌ അസ്വാഭാവിക മരണത്തിനു കേസെടുത്തു.സംഭവം നാടിനെ കണ്ണീരിലാഴ്ത്തിയിരിക്കുകയാണ്. ഹസ്സൻ ഷഹബാസ് മരിച്ച ഹുസൈൻ ഷഹബാസിന്റെ ഇരട്ട സഹോദരനാണ്. സഹോദരി: സഹജ .